नेपाली हास्यव्यङ्ग्य अनलाइन पत्रिका

डा. दामोदर पुडासैनी किशोर :

आइमाई- १
आइमाई चलमल नगरेको क्षण
ठप्प हुन्छ सारा स+सार

आइमाई नचलेपछि
सृष्टि रोकिन्छ , गति रोकिन्छ र मृत्यु रोकिन्छ
तैपनि कसैले किन ठानिरहेछ
आइमाईलाई केवल एउटा खेलौना

अहिलेसम्म आइमाईलेनै बचाएकी हो
प्रेम, यात्रा र उज्यालोलाई
उसले आँखा झिम्क्याएकै बेला
जन्मिएकोथियो सँसारमा एउटा ईश्वर

किन छैन
थकाई नामको शब्द आइमाईको शब्दकोशमा
म जीवनभर सोचिरहेछु

आइमाई- २
आज बिहानै मैले देखेँ एउटा अटल पहाड
पहाड जस्तै
पहाडको अघिल्तिर
उभिएकी थिई एउटी आइमाई

पहाडलाई
नदीहरुले छोडेर हिँडिरहेथे
चराचुरूङ्गी, रूखपात र मान्छेहरूले छोडिरहेथे
ऋतुहरू आउँथे तर, हिँडिहाल्थे पहाड छोडेर
पहाडले बुझिरहेथ्यो सबैकुरा
र, बिना हलचल उभिरहेथ्यो समयसँगै

पहाडजस्तै
पहाडको अघिल्तिर
उभिएकी थिई एउटी आइमाई ।

०००
काठमाडाैं