नेपाली हास्यव्यङ्ग्य अनलाइन पत्रिका

डा. दामोदर पुडासैनी किशोर :

भुवाहरू-१
जागिरको शुरूवाती दिनहरूमा
जब म जागिर खान अफिस जान्थेँ
मेरो कुर्सीको पल्लो कुर्सीमा बस्थिन्
एउटी टाइपिस्ट दिदी
ट्याक ट्याक ट्याक ट्याक
किबोर्डको आवाजसँगै प्रेमका गीत गाउँथिन्
र एकजनासंग प्रेम छ भन्दै डेटिङमा जान्थिन्

हिजो चौबाटोमा भेट भयो उनै दिदीसँग
भन्थिन्-
प्रेमीले उहिल्यै अर्कैसँग बिहे गर्यो
र बसाईँ सर्यो
बीचमा धेरैसँग प्रेम भए
उनीहरूपनि कता कता गए
अहिले आफैँलाई माया गर्दै हिँडिरहेछु

आफैँसँग माया हुनुजस्तो मीठो
हुनेरहेछ अरू केही ।

भुवाहरू-२
अफिसमा थिई एउटी टेलिफोन अप्रेटर
हाकिमदेखि पियनसम्म उसलाई सुन्दर भन्थे र पछि लाग्थे
सबै झुम्मेको सह्य नभएपछि
हाकिमले अप्रेटरलाई बनाइदियो अफिसर
र बनायो आफ्नै पर्सनल सेक्रेटरी
अविवाहित पीए प्रेगनेन्ट भन्ने खबर छापिएपछि
एकाएक गायब भयो हाकिम कार्यालयबाट
पिएको पेट तुहियो

झन् धेरै झुम्मिन थाले मान्छेहरू उसको वृत्तमा
आज उसलाई पार्कमा मगन्ते र बहुलाई भेटेँ
भन्थी-
बहुलाहरूले एक एक रात निद हराम पारेथे मलाई
अहिले मैले
उनीहरूको पुरै जीवनमा नीद हराम पारिरहेछु ।

०००
गाेंगबु, काठमाडाैं