नेपाली हास्यव्यङ्ग्य अनलाइन पत्रिका

असरल्ल बिस्कुन सुकाएर
ठमठमी हिँडिरहने हिजोका बुख्याँचाहरू
आज गल्लीगल्लीमा लम्पसार परिरहेका छन्
डबलीहरू डबकाबाट माथि उठेर
पेगसँग सभ्यता साट्तै
आलिसान महलमा ओथारो बसेका छन्
न्यु रोडबाट च्यातिएका सडकहरू
ठेकेदारसँग लम्पसारिँदै बुट्यानहरू उप्काउन
घर बलेँसी भत्काउँदै डाँडाकाँडा भोट माग्न
चाउचाउका प्याकेटसँगै रोटी साटिरहेछन्
जडीबुटी ओसारेर ट्याब्लेटसँग मितेरी गाँस्तै
होमस्टेका नाममा पर्यटकहरू गरिबीसँग स्वाद साटिरहेछन्
बालबनिताहरू च्यातिएका सडकहरूबाट एकत्रित हुँदै
भिजिट भिसा लिएर विश्व सफर गरिरहेछन्
मरिरहेका स्थानीय सिपहरू राजमार्ग हुँदै
पसिना बगाई रित्याइरहेछन् र
सपनाको उडान भर्दाभर्दै कफिनमा लाम लागेका छन्
बग्रेल्ती गोरेटा, घोडेटाहरू डोजरले क्षत विक्षत पार्दा
कौमार्य हराएर सडकहरू बलात्कृत भएका छन्
त्यसैले त मेरो गाउँ न गाउँजस्तो छ न सहरजस्तो
अप्ठेरोमा फलेका फर्सीजस्ता मेरा गाउँका सडकहरू
संस्कृति र सभ्यतासँगै नौलो पहिचानका लागि
धुजाधुजा भई च्यातिएका छन् तर पनि
साँढेहरू रजाइँ गरिरहेका छन्
यिनै च्यातिएका सडकहरूमा !

०००
२०८० साल वैशाख ४
काठमाडौं