नेपाली हास्यव्यङ्ग्य अनलाइन पत्रिका

ए हाम्रा नेता हो —-
हाम्रा नेता बासी अनि ढुसी पर्‍या लड्डु जस्ता
कुच्चिएर कबाडीलाई दिनुपर्ने भड्डु जस्ता ।
स्याल जस्ता ब्वाँसा जस्ता, मुसा र छुचुन्द्रा जस्ता
नढाँटेर भन्नुपर्दा हाम्रा नेता कस्ता कस्ता ।

ए हाम्रा नेता हो ……..
हाम्रा नेता न त सज्जन न बिचरा पागल जस्ता
श्मशान कुरी बस्ने, अघोरी बाबा जस्ता
कोही अमरिस पुरी जस्ता, कोही गब्बर झै जब्बर
पाँच बर्षमा झुल्केपछि हुन्छन् ती बेखबर ।

ए हाम्रा नेता हो ….
हाम्रा नेता महासयको सोंचै कति अग्लो गाँठे !
स्गरमाथामा नि भ्यू-टावर बनाए हुन्थ्यो गाँठे !
पूर्व पश्चिम हो २, रेल कुँदाउँछन चुनावी भाषणमा
सिङ्गापुरै बनाउँछन् बसी उँचा आसनमा ।

ए हाम्रा नेता हो —
कोहीले भन्छन् हाम्रा नेता साँच्चै गोबर गणेश जस्ता
कोहीले भन्छन् निकम्मा अनि भ्रष्टका नाइके जस्ता ।
देशै खान्छन् हो२ पचाउँछन्, देखेकै हो जानेकै हो
त्यसैले त हाम्रा नेता भनीकन मानेकै हो ।

ए हाम्रा नेता हो …..
ह्याकुला र फिला आफ्नो भूँडीभित्र छिराइ हाल्छ्न्
आन्द्राभूँडी पुच्छर कान कार्यकर्ताको नाम पार्छन् ।
कर्मचारी २ बोंसे आन्द्रो पाएपछि मख्ख पर्छन्
जनतालाइ हेरीहेरी हिं हिं हिं हिं हिं हिं गर्छन् ।

ए हाम्रा नेता हो….
हाम्रा नेता काम नलाग्ने ठाँडा जस्ता,
कोही बिषालु काँडा जस्ता साँच्चै भन्दा घाँडा जस्ता,
कोही नभएका छाडा जस्ता ।
न भ्याकुता न त माछा, बरु चेपागाँडा जस्ता ।

ए हाम्रा नेता हो ……
माखो पनि नमार्नेलाई हैजाले नि किन लान्न !
देशै कङ्गाल पार्नेलाई कालले पनि किन खान्न !
कुकुर जालान् २ बरू काशी अहँ यिनी जाँदै जान्नन्
हयात् अनि सोल्टी होटेल बाहेक अन्त कतै खान्नन् ।

ए हाम्रा नेता हो ——
हाम्रा नेता दाँत फुस्केका, करौती जस्ता
मोदीजीका, लगौटी जस्ता ।
जहिले पनि उतै शरणम्
सत्ता निम्ति चरण परणम्
हाम्रा नेता भन्न पनि लाज सरम
लाजै पो लाग्न थाल्यो गाँठे ! धत्तेरिका !!

०००
२०८०/०१/११
भैरहवा, रूपन्देही
९८६७२९१७४६