नेपाली हास्यव्यङ्ग्य अनलाइन पत्रिका

उत्तमकृष्ण मजगैयाँ

अतृप्त भोक प्यासले रुँदै हिमालमुन्तिर
म दानपात्र ली खडा छु विश्वको अघिाल्तिर

सबै उदार राष्ट्र हो ! गरीब छौँ दया गर
कसोगरी चलाउने बजेट यो ? कृपा गर

न मार्ग छन् प्रशस्त आ सबै तँ नै खनाइदे
न बाँध पूल छन् यहाँ स्वयम् तँ नै बनाइदे

सफा गराइदे यहाँ जताततै छ फोहर
न हिँड्न सक्छु, चाहिए नयाँ जहाज मोटर

अनाज तैँ फलाइदे चुलो तँ नै जलाइदे
उपायहीन पङ्गु छौँ तँ राष्ट्र नै चलाइदे

छ देश ज्ञानशून्यझैँ सुविज्ञ तैँ पठाइदे
तँ भूत, वर्तमान औ भविष्य के ? बताइदे

कि वीरको कि बुद्धको सुनाममा पठाइदे
विकास दान दे ! यहाँ तँ स्वर्गझैँ बनाइदे !

०००
दाङ