नेपाली हास्यव्यङ्ग्य अनलाइन पत्रिका

तारानाथ पराजुली :

(सिस्नुपानी मकवानपुरले ०८० वैशाख २२ गते आयोजना गरेको हास्यव्यङ्ग्य  कविता प्रतियोगितामा उत्कृष्ट २५ मा छनाेट भएकाे कविता  हाे याे ।  छनोटमा परेका २५ वटै र सहभागी अन्य हास्यव्यङ्ग्य कविताहरू फित्कौलीले क्रमशः पोष्ट गर्ने छ । कृपया आआफ्नो तस्वीर info@fitkauli.com  मा यथाशीघ्र पठाउनु होला । -प्रधान सम्पादक)

राजाको जब मञ्चमा गजबको देखिन्छ आरोहण
कावा खान्छ, अचम्मको सयरमा निस्कन्छ हाम्रो मन ।
हाम्रा नायकले चुसेर घर यो रित्तै भए तापनि
पार्टी छोड्न सकिन्न, बस्छु म यहीँ भोकै मरे तापनि ॥
१

माटोका मुटु अङ्ग अङ्ग यिनले बेचेर खाए पनि
हामी मान्न तयार छौँ मुलुकका हुन् अन्नदाता भनी ।
हाम्रा सन्तति अर्पियौँ विगतमा सुम्प्यौँ सबै चेतना
आँखा चिम्म गरी झुक्यौँ चरणमा, आनन्द पायौँ घना ॥
२

जो सोझा जनता थिए समरमा होमेर झुक्याइयो
आफ्नै आँगनमा लता जहरका रोपेर हुर्क्याइयो ।
ट्याक्सी, बाइक, एम्बुलेन्स पदमा छेक्छौँ र हिर्काउछौँ
सेना हौँ, हतियार हौँ हजुरका विश्वासका ढाल हौँ ॥
३

हाम्रा मौसुफको करामत बिना उत्पन्न के पो छ खै
नौटङ्की, बदमास हुन्, अबुझ हुन् हाम्रा विरोधी सबै ।
हो तर्सिन्न विपक्षका निकटमा भिड्छौँ र मर्छौँ बरू
हामी सभ्य समाज हौँ, अजय छौँ, भेँडाहरू हुन् अरू ॥
४

हत्यारा ठगका सभा जुलुसमा ताँती लगाएपछि
हाम्रो देश विकास हुन्छ सहजै ताली बजाएपछि ।
विद्वान् गायक पत्रकार कवि हो आओ बनी सारथी
पोखे भक्ति इनाम मिल्छ अरबौँ गाओ यही आरती ॥
५

०००
विहादी- २, पर्वत
९८६४४२४६६६