नेपाली हास्यव्यङ्ग्य अनलाइन पत्रिका

कृष्णकुमार कार्की :

बाँचुन्जेल खोजखबर हुँदैन
मरेपछि श्रद्धाञ्जली दिने ओइरो लाग्छन् ।
सास रहुन्जेल कुरा काटिन्छ !
मरेपछि गुणगानका कुरा साटिन्छन् ।

विवेशून्य कृपण जीवन बिताउँछन्
हाइनेक बाहिर सुनको सिक्री ढल्काउँछन् ।
भोजभतेरमा पैसाको खोलै बग्छ !
को भन्दा को कम भनी जुँगा बटार्छन् ।

धनी र नेता भोजका विशेष निम्तालु बन्छन्
राता सेता प्लेटले उच्च सम्मान पाउँछन् ।
सहोदर दाजुभाइ नआए के फरकपर्छ र !
अरु नै भोजका विशेष आकर्षण बन्छन् ।

गाउँघरमा खेत बारी बाँझै राख्छन्
सहरमा कौशी खेतीमा रमाउँछन् ।
एक बित्ताको चिचिन्डो फल्यो भने !
आर्गेनिक भन्दै फेसबुकमा हाल्छन् ।

निष्ठा समर्पणको राजनीतिमा खडेरी परेछ
लुट्ने कमाउनेको देशमा ठूलै धन्दा चलेछ ।
मान सम्मान अगुवा पछुवा पाए रूपरङ्गै फेरिने !
त्यसैले देशमा पदको होडबाजी चलेछ ।

अपराधीलाई हाम्रो गणतन्त्रले आममाफी दिन्छ
पद पाउँन विदेशीको आशीर्वाद नै चाहिन्छ ।
नेपाली हुनुको गर्व नै कहाँ रह्यो ‘महाशय’
डलर भारुमा यहाँ नागरिकता किन्न पाइन्छ ।

०००
टोखा नगरपालिका-५, काठमाडौं
हाल- लेकसाइड, पोखरा