नेपाली हास्यव्यङ्ग्य अनलाइन पत्रिका

लक्ष्मण नेवटिया :

भ्यागुताको बिहे -१

गर्मीको बहानामा
पानीको चाहनामा गराइयो
भ्यागुताको बिहे हतार हतारमा-
केही नबुझिने ट्वार ट्वारमा ।

तर कतै पोथी दुलही नदेख्दा ।
कसलाई दिने बधाई ।
हरे !! दुवै भ्यागुता परे
– “जुम्ल्याहा दाजुभाइ ।”

भ्यागुताको बिहे- २

गर्नु पर्ने सबैथोक गर्दा
एक थोपा पानी नपर्दा
पोखरीको मिस भ्यागुतीको
पोखराको मिस्टर भ्यागुतासँग
शानदार गराइयो बिहे ।

बजाइयो पञ्चेबाजा
सजिएका थिए गजबले
क्या दुलही रानी-
क्या दुलहा राजा ।
हरे ! फेरि भयो बवाल
पानी पर्‍यो मुसलधारे कमाल
पस्यो बाढी यत्र-तत्र-सर्वत्र
जोगिन अतिवृष्टिबाट
उपाय केही नलागेर
झट्ट लगेर अड्डामा
गराइयो छोड-पत्र ।

०००
विराटनगर