नेपाली हास्यव्यङ्ग्य अनलाइन पत्रिका

के.पी. पौडेल :

चलेछ उग्र काण्डको, विशेष नाट्य ताण्डव ।
इमान धर्म बेचियो, विकार बोक्छ मानव ॥
जताततै दलालको, मिलेमतो भयो अब ।
ल देशको भँडारमा, रमेछ आज मानव ॥ -१

बढेछ आज रुग्णका, दशा व्यथा र क्रन्दन ।
छिमेकको प्रभावमा, परेर गर्छ शासन ।
ल दाजु भाइ लड्दछन्, विकास रोक्दछन् सब ।
कुतर्कको प्रभावमा, परेर नाच्छ मानव ॥ -२

असत्यको छ कल्पना, विभक्तको छ योजना ।
अनन्तको छ चाहना, गुमेछ सौम्य भावना ॥
दया विवेक सत्यता, कठै कता गयो सब ।
विचारले र तर्कले, चलेन आज मानव ॥ -३

ठुला ठुला अचम्मका, दशा व्यथा उमार्दछन् ।
ल भाइ भाइ लड्दछन्, गुहार माग्न व्यस्त छन् ॥
अखण्ड राष्ट्र वीरको, गुमेछ आज गौरव ।
हुँडार उल्लु कालझैँ, बनेछ आज मानव ॥ -४

कथा छ आज राष्ट्रमा, दशा व्यथा अभावको ।
दुसाध भ्रष्ट उग्रमा, छ दृष्टि त्यो खराबको ॥
ल साधु निम्न वर्गमा, कडा दशा बढ्यो अब ।
असभ्य दुष्ट भूतझैँ, हराम बन्छ मानव ॥ -५

जमात भ्रष्ट उग्रका, मिलेर लुट्न पल्किए ।
बनेर ठालु राष्ट्रको, कराल बन्न तम्सिए ॥
घमन्ड छुद्र कर्मले, विलाप छर्छ दानव ।
बनेन पूज्य ईशझैँ, दुसाध बन्छ मानव ॥ -६

०००
बट्टार,नुवाकोट, हालः- बालाजु,काठमाडौं
मोबाइल नं.- ९८४१७५८१८४