नेपाली हास्यव्यङ्ग्य अनलाइन पत्रिका

घनश्याम रेग्मी :

कस्तो हास्य छ हेर यो मुलुकमा ढुङ्गाहरू हाँस्दछन्
बाजाको सुर ताल छैन तर यी नेता यहाँ नाच्दछन्
भेडाका उपकार निम्ति बिचरा ब्वाँसाहरू पीरमा
भैंसी घाँस रुचाउँदैन अहिले पल्क्यो पुरी खीरमा ।१

माछाले मछुवारका वदनमा माला लगायो अरे
भाले बास्न गरेर अल्मल यता घामै उदाएन रे
मत्ताका गज दन्त झार्छ बलियो फिस्टे पर्यो वीरमा
भैंसी घाँस रुचाउँदैन अहिले पल्क्यो पुरी खीरमा ।२

सत्ताको कति हान थाप छ यता थाप्छन् कुनै द्रौपदी
भत्ताको बटवार मिल्न नसकी फिर्ता हुँदै बन्धकी
पानी बग्छ उँभो अहो रुखहरू दौडे अरे भीडमा
भैंसी घाँस रुचाउँदैन अहिले पल्क्यो पुरी खीरमा ।३

कोरोना डरले लुकेर अब लौ भाग्यो उता खै कता
भोका दीन दुखी सबै अब भए आरोग्य सम्पन्नता
माछो डाक्दछ जाल हान्न ल छिटै आऊ तिमी तीरमा
भैंसी घाँस रुचाउँदैन अहिले पल्क्यो पुरी खीरमा ।४

कैयौंले जल यानबाट सजिलै सामान ल्याए उता
क्या राम्रो बिजुली धपक्क, घरमा ग्याँसै झरेको उता
छायाँ दिव्य प्रधानको चहकिलो पर्दै छ रे नीरमा
भैंसी घाँस रुचाउँदैन अहिले पल्क्यो पुरी खीरमा ।५

लत्री पाउ परे गिरे चरणमा मानौं घुमेको धनु
आइन् एक जरा र सन्ध गरियो पार्टी बनेको भनूँ
ती टुक्रा अहिले त लोभ छलले फस्दै गए क्षारमा
भैंसी घाँस रुचाउँदैन अहिले पल्क्यो पुरी खीरमा ।६

०००

भरतपुर ५, चितवन
हाल – बाँके