नेपाली हास्यव्यङ्ग्य अनलाइन पत्रिका

सुभाषचन्द्र देवकोटा :

तिम्रो देशभक्ति ,
फगत धोका हो !

बलेसी खनेर,
देशको जग कसले भत्कायो ?
सन्धि, सम्झौतामा सही ठोकेर,
देशको नाभिमा किला कसले ठोक्यो ?
पूर्खाको इमान पोलेर,
बेइमानीको खेती कसले गर्‍यो ?

धुरीखाँबो भाँचेर,
सत्ताको लिस्नो चड्ने को थियो ?
देशको छानो उधिनेर,
मझेरीमा चोर हुल्ने को थियो ?
देशको चीरहरण गरेर,
सुनको लङ्का बनाउने को थियो ?

इतिहासका यस्ता अनगिन्ती,
यक्ष प्रश्नहरूबाट
तिमी कसरी उन्मुक्त हुन सक्छौ ?

बेइमानीको दाना खाएर,
ईमानको कुरा कसरी गर्न सकिन्छ ?
देशको छानो उधिनेर,
देशको माया कसरी गर्न सकिन्छ ?

त्यसैले,
तिम्रो देश प्रेम,
तिम्रो देशभक्ति,
गोहीको आँसु हो !
मात्र फरेब हो !
धोका हो !

०००
गोरखा