नेपाली हास्यव्यङ्ग्य अनलाइन पत्रिका

के.पी.पौडेल :

(रुसयुक्रेन युद्धबाट भविष्यमा निम्तिन सक्ने गम्भीर असरहरू)

जाग्यो युद्ध प्रचण्डले यदि भने, होला खुबै दुर्गति ।
सारा पक्ष विपक्ष राष्ट्रहरूमा, जाग्ला खराबी मति ॥
जाली चाल विनाशका कदमले, बढ्ला दशा बेसरी ।
पापी कर्म लडाइँका कहरले, होला भलो के गरी ?॥-१

जाडोदेखि रिसाउने कदमले, पग्लन्न सारा हिउँ ।
चुक्ली कर्म छुल्याइँ युद्ध छलको, चाहिन्न ज्यादा निहुँ ॥
सोचेनन् किन युद्धभक्त रुसले, युक्रेनले मर्मले ?!
तेस्रो घातक विश्वयुद्ध थलमा, जाग्ला खुबै होडले ॥-२

सारा ती हतियार उच्च वमका, क्षेप्यास्त्रका भेदन ।
यस्ता उग्र प्रयोगका कहरले, पार्लान् धरा छेदन ॥
जोड्दै छन् हतियार हुन्छ खतरा, मान्छे रुँदैछन् बरा ।
पड्क्यो त्यो वम हाइड्रोजन भने, बन्लिन् खरानी धरा ॥-३

यस्तो चोट विनाश खप्नु कसरी, अन्धा बने शासक ।
आफ्ना स्वार्थ र लाभका कहरले, साँढे बने नायक ॥
यस्ता युद्ध खुबै भए विगतमा, चेत्दैन मान्छे किन ?।
धर्तीका सब जीवजन्तु भवका, मासिन्छ है जीवन ॥-४

जेलेस्की अति राष्ट्रभक्तपनको, सङ्घर्षमा उत्रिए ।
सत्तामोह र स्वार्थका पुटिन ती, हुँङ्कारले चम्किए ॥
कालो बादल घुम्छ रम्छ नभमा, फिक्का भयो चन्द्रमा ।
मासिन्छन् नर दम्भका कहरले, त्यो युद्धको पर्वमा॥-५

पानी, वायु, अकास, तेज, पृथिवी, ब्रह्माण्डका तत्व हुन् ।
यो संसार चलाउने सहजका, उम्दा भला सार हुन् ॥
यो धर्ती नभ वायुमण्डल छटा, मान्लान् खुबै झन्झट ।
यस्ता युद्ध विनाशका कदमले, जाग्छन् ठुला सङ्कट ॥-६

झर्ना, ताल, हिमाल, सागर, नदी, खानी, जिमी, पत्थर ।
हाम्रा प्राकृत सम्पदा अवनिका, बन्लान् खुबै जर्जर ॥
सारा जीवहरू वनस्पति सबै, टिक्लान् र के यी सब ?।
साझा यो घरको यसै अवनिको, अस्तित्व गुम्लान् अब ॥-७

लाग्लान् पक्ष विपक्षमा नरहरू, बन्लान् वृथा पण्डित ।
होलान् खण्डित देश विश्व जगका, बन्लान् दुखी शासित ॥
फस्लान् देशहरू अनेक गुटमा, बढ्लान् समस्या खुबै ।
चल्लान् शासक बाह्य शक्ति मतले, गुम्ने छ सुद्धी सबै ॥-८

ज्यादा शक्ति प्रभावका मुलुक ती, बन्लान् र ! के रक्षक ।
अन्तर्राष्ट्रिय शक्ति कानुन मिची, बन्लान् खुबै भक्षक ॥
साना शक्ति र निर्धनी मुलुकमा, मिल्दैन उम्दा धन ।
बाठा शासक शक्ति राष्ट्र सबले, पार्लान् धुलो जीवन ॥-९

०००
बट्टार, नुवाकोट । हाल ः बालाजु, काठमाडौं ।
मोबाइल नं. ९८४१७५८१८४