नेपाली हास्यव्यङ्ग्य अनलाइन पत्रिका

घनश्याम रेग्मी :

टमाटर महँगो भो के अचम्मै भयो यहाँ
यहाँ बाँकी थियो के र यो नौलो मानियो यहाँ ।
कहिले प्याजको भाउ चर्को आकाश चुम्दछ
महँगो गोलभेँडा भो टाउको फन्न घुम्दछ ।

पाइन्न भन्दछन् कोही चर्को भाउ भने कतै
आज चर्चा यसैको छ गाउँ सञ्जालमा जतै ।
उस्तै पीडा यता बोकि पोखिन्छु कविताभरि
परनिर्भरता कस्तो हामी नाङ्गै भएसरि ।

साग मुला कुटी सिन्की आमाले घरमा बसी
हिउँदे याम पारेर राख्नु हुन्थ्यो मुठी कसी ।
चाना पारी सुकाएका काँक्रा फर्सी रआँपका
गोलभेँडा तथा साग कुभिन्डो धेर जातका ।

पाकेको चुक पाइन्थ्यो अमिलो क्या मिठो हुने
एक थोपा भए काफी धेरै पो किन चाहिने ।
कागती अमिलो ताजा बोटका टिपी खाइने
इष्टमित्र कयौंलाई सित्तैमा लान हो दिने ।

सिन्की चाना सुकाएका पाइन्नन् खै यतातिर
पुराना प्रविधि त्यागी लाग्दै छौँ खै कतातिर
विलासी मोजका वस्तु गर्दै आयात देशमा
कङ्गाली बन्न आत्तिन्छौँ हाम्रो माया विदेशमा ।

अहिले फुर्सदै छैन सिन्की चाना बनाउने
नेट सञ्चारमा व्यस्त अचार किन्न पाइने ।
यसो फुर्सद पाएमा भिडियोमा भिडे भयो
टिकटक चलाएर समय व्यर्थमा गयो ।

कामकाजी बनेका छन् घर छोडी बजारमा
आम्दानी रुपियाँ हुन्छ सयौं हैन हजारमा
तैपनि गोलभेँडाले ताली पाउन्न खै किन
आउला कहिले फर्की हाम्रा कि कहिल्यै दिन ।

यो चिन्ता मूल्यको हैन चिन्ता हो परनिर्भर
भोलि खै कसरी धान्ला रेमीले देशको भर ।
त्यसैले दीर्घकालीन सोच राखेर बढ्नु छ
आकाशे महँगीलाई थला पारेर गोद्नु छ ।

०००
भरतपुर- ५, चितवन
हाल – बैजनाथ- १, चिसापानी, बाँके