नेपाली हास्यव्यङ्ग्य अनलाइन पत्रिका

घनश्याम रेग्मी :

यता छ खाली सिट सम्धिनीको
सम्धी भए के पद छोड्न हुन्थ्यो
छोरा र छोरी अझ भर्न बाँकी
तेस्रो अझै नम्बर काकु काकी ।१

दो चार टङ्की अझ भर्न बाँकी
हुने कुरा हुन् छलछाम ढाँटी
सामान किन्दा पनि चाट हात
रोगादि आए पनि दिन्छ साथ।२

साला मिलेमा अझ पोष्ट खुल्छन्
बेकार मान्छे किन कुन्नि रुन्छन्
साली छ खाली पदमा नभाकी
आफ्नै छ साली घरमा नगाकी ।३

बाँचुन् मरुन् मत्लब कत्ति छैन
पैसा र सामर्थ्य न भै भएन
ईश्वर हो होइन भन्छ कस्ले
मान्छे मरे भो किन रुन्छ उस्ले ।४

गरीब भै बाँच्न भनेर आयौ
टपक्क छापा मतमा लगायौ
तिहाइ तिम्रो मतले दिएको
खोसेर तिम्रो कसले छ खाको ।५

त्रिपाल जस्ता अझ तान्न बाँकी
कात्रो किने मिल्छ निकै न फाँकी
ठेक्का र पट्टा अब मिल्न सक्छ
मुहानबाटै सब छिन्न पर्छ ।६

सम्धी भए आड भरोस हुन्छ
छैनन् कसैका किन लुट्न पर्छ
समात सम्धी बलियो गरेर
सम्पन्नताको अब सूत्र हेर ।७

ठेक्दार छोरो किन औसधी त्यो
समात सेना र कमाउ थुप्रो
कुरा दुई हुन्छ भनेर भन्छौ
सम्धी समाती कति हिँड्न सक्छौ ?८

०००
हाल : बैजनाथ -१, चिसापानी, बाँके