नेपाली हास्यव्यङ्ग्य अनलाइन पत्रिका

घनश्याम रेग्मी :

घोडे जात्रा छ नेताको कोही बोकेर कुद्दछन्
हरियो घाँस चाराको बुजो हाल्छन् लुँड्याउछन् ।

जात्रै जात्रा छ नेताको घोडेजात्रा जताततै
जात्रामात्र भए हुन्थ्यो हुने हल्लुँडझैँ यसै ।

सवारी पीठमा बोकी तबमात्र चले यिनी
कसेर हानियोस् कोर्रा तत्कालै ती कुदे अनि ।

अर्काको डाहले भारी आफूमाथि चढाउने
जिन्दगीभर बाँधिन्छन् घाँस खाएर उग्रने ।

कता हो दौडिने थाहा छैन निर्देश पर्खिने
हिन्हिनाए बिनासित्ति तवेला ध्वस्त पार्दिने ।

चना दिन्छ कुनै अर्को अर्कै कोही सवार छ
चुनावी याममा नेता हेर कस्तो हतार छ ।

गाई स्वतन्त्र देखेमा मान्छेका कान फुक्दछ
बोकेर पीठमा मान्छे गाई पक्रन लाउँछ ।

गधाको वीर्य थापेर जन्मे सन्तान खच्चर
घोडा हो जे छ जस्तो छ उस्तै नेता यहाँ तर ।

०००
भरतपुर -५ चितवन
हाल ः बैजनाथ -१ चिसापानी, बाँके