नेपाली हास्यव्यङ्ग्य अनलाइन पत्रिका

कृष्णप्रसाद गौतम :

ऊ घरकै हो, आफ्नै घरको
देख्दा जे देखिन्छ तर अर्कै हो
ऊ आफूलाई सेवक हूँ भन्छ
वास्तवमा ऊ व्यापारी हो
उसको रुचि व्यापार,
पेसा व्यापार मान्दछ
ऊ त्यही हो अपार
ऊ कसैदेखि डर्दैन
घाटाको व्यापार गर्दैन ।

बुझेर बुझिनसक्नु
बुझाएर बुझाइ नसक्नु
यसको अमाप्य विस्तार
गनेरै नसकिने प्रकार
व्यापार सर्वव्यापक सर्वाधार !

हजार जिब्रे शेष नागले
व्याख्यान गर्न नसकेको यसको रूप
कसरी बुझाउन सक्छ उसले
सिर्फ् ऊ बुझ्छ तर बुझाउँदैन
बुझाओस् पनि कसरी ?

मात्र दुई जिब्रा छन् उसका
एउटा फड्कार्ने, अर्को लट्पट्याउने
फगत् त्यही भन्छ-
व्यापार उसको जीवन हो
प्रतिष्ठा र ईश्वर हो
त्यसैले ऊ व्यापारी हो ।

दालचामलदेखि आलु परौठासम्म
कपडा छोकडादेखि चपडासम्म
पानीदेखि कानीसम्म
नुनदेखि सुनसम्म
किरादेखि हिरासम्म
गाईदेखि माईसम्म
नैतिकतादेखि नागरिकतासम्म
हिसाबदेखि निसाफसम्म
जागरुकदेखि नागरिकसम्म
गणतन्त्रदेखि ग्रहणतन्त्रसम्म
पत्तादेखि सत्तासम्म
के बेच्दैन उसले !
ऊ व्यापारी हो ।

पाँच वर्ष कमाउँछ
सकेसम्म जमाउँछ
टाठाबाठा समाउँछ
अनि बिस्कुन फिजाउँछ
सोझासाझा रिझाउँछ
पातला ओठ सिलाउँछ
कुरा ठ्यामै मिलाउँछ
फेरि ऊ उहीँको उहीँ
अनि कसको के लाग्छ
हो, ऊ बबाल व्यापारी हो
कसैदेखि डर्दैन, घाटा व्यापार गर्दैन ।

ऊ व्यवहारभन्दा व्यापार गर्छ
आइलाग्नेलाई वारपार गर्छ
केस बदल्न सक्छ,
भेस बदल्न सक्छ
परिवेश बदल्न सक्छ
सिङ्गै देश बदल्न सक्छ
सक्छ मात्र होइन यार !
कृषिप्रधान देशलाई
कुर्सीप्रधान बनाइसक्यो हैन र ?

अर्थनीति, राजनीति, धर्मनीति, सर्मनीति,
कुटनीति, भुतनीति
आफ्नै हात भएसी
तिती तिती जाइजा, मिठी मिठी आइज
भएन त मालामल !
ऊ व्यापारी हो
कसैदेखि डर्दैन, घाटा व्यापार गर्दैन ।

०००
इटहरी ।