नेपाली हास्यव्यङ्ग्य अनलाइन पत्रिका

हरिप्रसाद पौड्याल :

फाटेको लाउँछन् टोपी सन्तति न्यानु राख्तछन्
कर्तव्यबोधले बाबु पसिना नित्य पोख्दछन् ॥१

भारी क्विन्टलको बोक्ता थाप्लोमा डाम प्रष्ट छ
मियो हुन् घरका बाबु भन्दैनन् तर कष्ट छ ॥२

उठेका हातमा ठेला कुर्कुच्चा छन् चिराचिरा
मरुभूमि खनी पार्छन् बाबु नित्य हराभरा ॥३

कसैलाई नहोस् दुःख आफ्ना सन्तानमा भनी
गर्दछन् सञ्चिता बाबु थोपा थोपा गनीगनी ॥४

प्यारा सन्ततिमा हाँसो देख्न पाए भने उनी
बिर्सन्छन् दुःख सम्पूर्ण भन्छन् धन्य भयो जुनी ॥५

वटवृक्षसरि बाबु छहारी हुन् निरन्तर
बाबुको महिमागान पूर्ण को गर्न सक्छ र ! ॥६

०००
झापा ।