नेपाली हास्यव्यङ्ग्य अनलाइन पत्रिका

हरिप्रसाद पौड्याल :

सत्ता परिवर्तनको सपना बाँडेर
पड्काइए बन्दुकहरू
बगाइयो रगतको खोलो
जन्माइए शहीदहरू

तर मात्र मारिए इमानदारहरू
बाँचे बचाइए गद्धारहरू
भ्रमको बिउ छरेर खेती गर्नेहरू
जालीझेली र बेइमानहरू

अहिले
आँसु पिएर बाँच्न बाध्य छन्
जिउँदा शहीदहरू
पश्चातापको आगोमा जल्दै छन्
सिपाही र लडाकुहरू

आफ्नै आँखा अगाडि
खसी बोका काटेझैँ
प्रिय व्यक्ति ढलेको दृश्य
काख रित्तो हुने आमाको वेदना
सिन्दुर र सहारा गुमाउनेहरूको क्रन्दन
उफ् ! बुझ्दैनन् पत्थरको मन हुनेहरूले
रक्तपिपासु हिंस्रक बाघ र ब्वाँसाहरूले
दुधको साक्षी बिरालाहरूले
झोले, चम्चे र गोठालाहरूले

सिंहदरबारको झ्याली पिटेर
स्यालदरबारको हुइयाँ मच्चाउनेहरू
तलदेखि माथिसम्म मिलाई मिलाई
खल्ती, एटेजी र पानीट्याङ्की भर्नेहरू
तिम्रो चरित्र देखेर शिर निहुराउँदै छन्
जिउँदा शहीद र घाइतेहरू
रित्तो काख भएका आमाहरू
आँट र भरोसा हराएका बाहरू
सिन्दुर पुछिएका चेलीहरू
दौँतरी गुमाएका सहपाठीहरू
भविष्य गुमाएका बेसहाराहरू ।

सत्ता परिवर्तनको सपना बाँडेर
पड्काइए बन्दुकहरू
बगाइयो रगतको खोलो
जन्माइए शहीदहरू ।

०००

मेचीनगर १०, धुलाबारी , झापा