नेपाली हास्यव्यङ्ग्य अनलाइन पत्रिका

हरिप्रसाद पौड्याल :

१.
भन्छन् कोही भाँडतन्त्र कोही गाँडतन्त्र
सुन्ने गर्छु भन्छन् भयो कोही साँडतन्त्र
जस्तो देख्छन् उस्तै भन्छन् दृष्टि भएपछि
सबल हुन सकोस् मेरो प्यारो गणतन्त्र ॥

२.
देखिँदैन बाहिर तर चलेको छ धन्दा
महँगीले ढाड सेक्छ बढेको छ चन्दा
थेग्नै नसक्ने गरी कर वृद्धि भएपछि
गणतन्त्रवादी जनता ढलेको छ कन्दा ॥

३.
यहाँ एकले अर्कालाई लडाउन खोज्छ
जान्दैन आफू अरूलाई पढाउन खोज्छ
आफैँ कुहिएर डुङ्डुङ्ती गन्हाए पनि
जबर्जस्त अर्कैलाई सडाउन खोज्छ ॥

०००
धुलाबारी, झापा