नेपाली हास्यव्यङ्ग्य अनलाइन पत्रिका

हरिप्रसाद पौड्याल :

१.
लुटेराको फन्दामा निमुखा मान्छेहरू पर्दै छन् यहाँ
जति उकालो चढ्न खोजे पनि ओरालो झर्दै छन् यहाँ
न्याय मरेको देशमा सास फेर्नुको के अर्थ हुन्छ र महाशय !
बाँच्ने आधार गुमाउनेहरू मृत्युवरण गर्दै छन् यहाँ ॥

२.
सुन्दै छु बेमौसमा पनि भेल चल्छ रे यहाँ
न्याय दबाउन पैसाको खेल चल्छ रे यहाँ
पत्याउने हामी छँदै छौँ भाषण ठोक महाशय !
प्रत्येक चुनावमा पूर्व पश्चिम रेल चल्छ रे यहाँ ॥

३.
अनौठो बाध्यता छ श्रम गरे पनि गरिबले आशमा बाँच्नुपर्ने
ठगी खान पल्केका भ्रष्टाचारीले पैसाको रासमा बाँच्नुपर्ने
शहीदको रगतको अपमान गर्दै छौ जानाजान तिमी महाशय !
मरेर गए वीपी, मदन र पुष्पलाल ती थिए खासमा बाँच्नुपर्ने

०००
धुलाबारी, झापा