नेपाली हास्यव्यङ्ग्य अनलाइन पत्रिका

हरिप्रसाद पौड्याल :

१.
खाए भनूँ कि हसुरे भनूँ स्यालहरूले लुकेर खाए
गल्लीडुलुवा भुस्याहा कुकुरहरूले भुकेर खाए
खान पल्केका खानकै लागि जन्मेका ब्वाँसाहरू
केही नभेटेपछि आफ्नै प्रतिबद्धता थुकेर खाए ॥

२.
खाए गफाडीहरूले हामीलाई ढाँटेर खाए
हाम्रो अमूल्य मत डलरसित साटेर खाए
खानुबाहेक अर्को उद्देश्य नै नभएपछि
हाम्रो मुटु टुक्रा टुक्रा पारेर काटेर खाए ॥

३.
तिमीले धन कमाए पनि उसले इज्जत कमाउन सक्छ
तनावयुक्त छौ महलमा तिमी ऊ झुपडीमा रमाउन सक्छ
रुपैयाँले मात्र बुझ्न सकिँदैन सृष्टिको विधानलाई महाशय !
एक चम्ची दहीले सयौँ लिटर दुध जमाउन सक्छ ॥

०००
धुलाबारी, झापा