नेपाली हास्यव्यङ्ग्य अनलाइन पत्रिका

हेमराज पौडेल :

छोडेर बाहिरै त्यो गाडी, म भित्र आएँ
तिम्रै समक्ष भित्री वृत्तान्त राख्न पाएँ ।
बिन्ती म गर्छु यस्तो राखेर शुद्ध भाव
इच्छा पुर्‍याइदेऊ, देवाधिदेव नाथ ॥१

सङ्केत बुझ्न सक्ने यो लस्करै लिएर
आएँ म माग्न सत्ता धेरै टिकोस् भनेर ।
मौका परे महात्मा भैदिन्छु, अस्त्रशस्त्र
त्यागेँ उतै, यहाँ त्यो चाहिन्न गेरुवस्त्र ॥२

नेता हुँ, कार्यकर्ता छैनन् त्यसै कुदेका
के ढाँट्नु, देवता हौ सारा कुरा बुझेका ।
हे देव ! के छ बुझ्छौ भित्री कुरा लुकेको
पैसा कमाउने नै उद्देश्य हो सबैको ॥३

छन् घोर राष्ट्रवादी मेरा यहाँ विचार
जाँदा छिमेकमा पो भैदिन्छु लम्पसार ।
यस्तै छ नीति हाम्रो ठूलाअगाडि झुक्ने
जो छन् स्वदेशभित्रै निर्धा, थिचेर राख्ने ॥४

दाता छिमेकमै छन् “हाम्रो जलै पवित्र”
भन्थे, लिएर आएँ यो हुन्न रे अशुद्ध ।
अर्पिन्छु नाथलाई स्नानार्थ यो विशुद्ध
इच्छा यही छ राम्रो हाम्रो बनोस् भविष्य ॥

०००
काठमाडौं