नेपाली हास्यव्यङ्ग्य अनलाइन पत्रिका

भरत गुरागाईं बर्बरिक :

त्यो आएपछि हामी एकदम भयभीत हुन्थ्यौँ
हामीलाई कल्र्याप्प निल्नेगरी आउँथ्यो त्यो,
उहिल्यैको कुरा हो ।
त्यो आएपछि हाम्रो हार निश्चित थियो
दिनभरि हामीले जम्मा गरेका सामान छरिन्थ्यो
भाँडाकुटीका भाँडाहरू पट्याकपुटुक फुट्थे
तन्मयताकासाथ बनाएको घर भत्किन्थ्यो
जतनले जोडेको सम्बन्ध टुट्थ्यो ।
त्यो आएपछि हामी एक्लाएक्लै घर जान्थ्यौँ ।
त्यसले त च्याप्दै च्याप्दै
समयलाई चाउरी पारिसकेछ ।
हिजोआज त्यसले हामीलाई छोड्दै छोड्दैन,
स्थायित्व बोकेर आएको छ
फर्किएर जाँदै जाँदैन,
रात त रात नै भैहाल्यो,
बिहान पनि दिउँसो पनि
त्यो कालो घाम बोकेर आउँछ ।
त्यसले उमङ्ग खाएको छ
बैंस खाएको छ
सपना खाएको छ हाम्रो,
हामी घोर ऐंठनले थिचिएका छौँ ।
त्यो फर्किन छोडेदेखि
हाम्रो जिन्दगी
जिन्दगी जस्तो छैन ।

०००
मोरङ