भरत गुरागाइँ बर्बरिकतस्विर
त्यो दिन आउनेछ, हजारौँ लाखौँ वर्षपछि पुरातत्वविद्हरू मङ्गलगान गर्दै आउनेछन् अर्को ग्रहबाट हराएको तस्विर खोज्न । दुईवटा जिवित आँखा उत्खनन् हुनेछ- त्यहीँ भेटिनेछ मान्छेको तस्विर ।
भरत गुरागाईँ बर्बरिक :
तस्विर धुमिल देखिएपछि,
पुछ्दा पुछ्दैको ऐना
झर्याम्म भुइँमा खसेपछि,
ऐनापनि सकिन्छ, तस्विर पनि हराउँछ ।
अन्जुलीमा उठेको दहको पानीमा
भैँसीको आहाल छ,
चेपागाँडाको सगबग
जूकाहरूको नृत्य
हिलोको वायुमण्डल छ,
खोज्न सक्दैन मान्छेले त्यहाँ
आफ्नो अनुहार ।
कालोपाटीबाट मेटिएझैँ
मेटिँदै जानेछन् तस्विरहरू,
मरुयात्राका पाइतालाका डोबहरू हराएझैँ
हराउनेछन् अतीतका यादहरू,
बाढीले बगाएर प…र पुर्याएपछि
बगरको ढुङ्गो बन्नेछ मान्छेको तस्विर,
कुनै दिन मान्छेले
स्वयम् आफूलाई हराउनेछ ।
त्यो दिन आउनेछ,
हजारौँ लाखौँ वर्षपछि
पुरातत्वविद्हरू मङ्गलगान गर्दै
आउनेछन् अर्को ग्रहबाट
हराएको तस्विर खोज्न ।
दुईवटा जिवित आँखा उत्खनन् हुनेछ-
त्यहीँ भेटिनेछ मान्छेको तस्विर ।
०००
मोरङ
