भरत गुरागाइँ बर्बरिकस्वयम्भूका आँखा
प्रत्येक दिन कर्याङकुरुङका बथानहरू मनमा सपना र पेटमा भोकको आगो बोकेर परदेश जान्छन्, आज पनि उसरी नै गए । जे हुँदैछ स्वयम्भूका आँखा अगाडि नै हुँदैछ ।
भरत गुरागाईं बर्बरिक :
बाँदरकै अन्न बन्यो मकै,
यसपालि पनि खोसेल्टा हेरेर नै अघाउने भए
तुइन चढेर स्कुलबाट फर्केका बच्चाहरू ।
अन्यायले पिल्सिएको
विधवाको एउटा मिसिलले
अदालतको ढोका ढक्ढक्यायो,
मुल्तवी चाङबाट बेन्चमा आइपुग्न
वर्षौँ कुर्नु पर्नेछ,
जबकि पीडितको नाममा
श्रद्धाञ्जली आइसकेको हुनेछ ।
सुनसर्जरीले जिन्दगी सुन्दर बनाएकाहरूले
जिन्दगीमा सुन नै नदेखेको
कसम खान सक्छन्
तामा, तुलसी र गीता छोएर,
अचम्म हुने छैन ।
प्रत्येक दिन
कर्याङकुरुङका बथानहरू
मनमा सपना र पेटमा भोकको आगो बोकेर
परदेश जान्छन्,
आज पनि उसरी नै गए ।
जे हुँदैछ
स्वयम्भूका आँखा अगाडि नै हुँदैछ ।
०००
मोरङ
Subscribe
Login
0 Comments
Oldest
