नेपाली हास्यव्यङ्ग्य अनलाइन पत्रिका

घनश्याम रेग्मी :

खाली बैठकका कक्ष माननीय उता जुटे
खाने बेला हुनै लाग्दा टुकुरा टुकुरा फुटे
कुम्ल्याएर करोडौंको सम्पत्ति परदेशमा
जनताको बिचल्ली यो देख्दैनन् घर देशमा ।

कहिले लाउँछन् आगो बन्द हड्ताल गर्दछन्
सत्ताको स्वादमा भुल्छन् देशको नाम भुल्दछन् ।
पाए जत्ति लिँदै जान्छन् कर्तव्य किन बिर्सने
संविधान यिनै लेख्छन् आफ्ना खातिर चाहिने ।

हत्या हिंसा रचाएर नाच्ने राक्षस चालमा
लोभी आँखा रसाएका कस्तो चाल छ पालमा ।
बोरामा सुन भित्रिन्छ भन्सार चुप्प बस्दछ
देशका बेचिए मान्छे साक्षी तस्कर बस्दछ ।

कानुनी राज खै छैन दाँयी गर्न मिले भयो
धारा ऐन जता जाओस् हाम गर्न पुगे भयो ।
कैयौं पल्ट यही लेख्छन् कैयौं पल्ट यी चेत्दछन्
देश बाँच्छ कि बाँच्दैन बाँदरे चाल गर्दछन् ।

पार्टीमा झगडा उस्तै लफडा गुट के कमी
सिद्धान्त पर सारिन्छ आफू सर्वज्ञ नै बनी ।
प्रजातान्त्रिक हो चाला देश प्रदेश खण्डित
आ आफ्ना डम्फू लौ ठोक नामी छौ सब पण्डित ।

देशका बलिया खम्बा युवा छन् परदेशमा
वृद्धवृद्धा बचेका छन् पहाडी घर देशमा ।
पढाइ ध्यानमा राखी बस्ती झर्छ मुकाममा
झोले गुन्डा घुसेका छन् सरकारी कुकाममा ।

धाँधलीले चुली नाग्यो अर्थतन्त्र गिरावट
नेताले कुटुरो कस्दै भाग्दै छन् ती फटाफट ।
नबुझ्ने जनता हामी यत्तिकै रनभुल्ल छौँ
बार्दलीबाट यो दृश्य हेरेर छक्क छक्क छौँ ।

०००

भरतपुर ५, चितवन
हाल : बैजनाथ -१, चिसापानी बाँके ।