नेपाली हास्यव्यङ्ग्य अनलाइन पत्रिका

रमेश खकुरेल :

अलिकता मनमा जब लोभ भो, अनि अनेकन तर्क वितर्क भो
छन त यो सुरुवाल छ मित्रको, तर कहाँ छ र औषधि लोभको ॥

सिउन सूत्र लिएँ अलि नक्कली, छ अनुहार भने अति सक्कली
अनि छिटै सुरुवाल सिई दिएँ, नगद चाहिँ गनेर खरै लिएँ ॥

पछि म जानु पर्‍यो उनको घर, चरणपोश लिने उनकै भर
तर यहाँ पनि लोभ छिर्‍यो जब, कमसलै कलभित्र पस्यो तब ॥

म छु यहाँ कमजोर परे जुता, छ नकली सुरुवाल हरे उता
न त दिगो छ यता न उता दिगो, अब दुवैतिर मुश्किल भैगयो ॥

म पनि झन् अझ लोभ बढाउँछु, अनि उनीसित झन् अझ दिक्क छु
हुनु थियो जुन अन्त उही भयो, अनि त नैतिकता अझ भासियो ॥

०००
कमलपोखरी, काठमाडौं ।