नेपाली हास्यव्यङ्ग्य अनलाइन पत्रिका

एम् .पी .कियरलेस :

भगवानमाथि प्रश्न उठाउने को हो ?
अहं ब्रह्मास्मि
तत्त्वमसि भनिरहँदा हुँदैन र ?
भगवान भएको महसुस ।
हामी मान्छे मान्छे नभएर
अमिबा हुनसक्थ्यौँ
कमिला हुनसक्थ्यौँ
अक्टोपस हुनसक्थ्यौँ
कुकुर हुनसक्थ्यौँ
चरा हुनसक्थ्यौँ
हामी जे पनि हुनसक्थ्यौँ
तर हामी मान्छे भयौँ ।
र
त
भगवानलाई महसुस गरिरहेका छौँ ।
भगवान जन्मेको माटो छ
स्वर्ग जाने बाटो छ ।
भगवानको तेस्रो आँखो छ ।
भगवान हिजो साँझ घाम सँगै अस्ताउन सक्थ्याे।
आज बिहानै भाले बिउँझाउने पनि भगवान नै हो ।
भगवान पहाड उचालेर बसिरहन्छ ।
भगवान विषपान पनि गर्न सक्छ ।
भगवान पाप मुक्त छ ।
दावा छ भगवान वीर्य बिनानै जन्मेको हो ।
भगवान बासना मुक्त छ ।
समय साक्षी छ
भगवानको घरमा स्त्रीलाई प्रवेश निषेध थियो ।
भगवान पवित्र छन् ।
बेला बेला
अबोध बालक
र
गर्भवती महिलाको
रगतले नुहाउँछ भगवान ।
हाम्रो पूर्वजले पनि
भगवानलाई रगतले नुहाइदिएको
गर्विलो इतिहास छ ।
भगवान प्रेम मुक्त छ ।
उसले प्रेम देखाउने प्रेमिकाको
नाक काटेको इतिहास छ ।
~दूध चुसेर स्त्री मारेको इतिहास छ ।
~ प्रेमिकाको अङ्गालो छोडेर हिँडेका
कयौं कथा छन् भगवानका ।
~भगवान अपलक भएर हेर्न सक्छ चिर हरणको दृश्य ।
~भगवानको जनेन्द्रिय स्त्रीको अस्तित्व
मेटाउन मात्रै काम आउने गर्छ ।
भगवानले महसुस गराएको छ ।
भगवान प्रेम मुक्त छ ।
भगवान नीराकार छ ।
~ चल्दै गरेको रेलमा चढ्न सक्ने उ मात्रै हो ।
– बारुदका गन्धमा फैलिएको उही हो ।
-उ घरमा आगाको मुस्लो भएर देखिन सक्छ ।
– उ म भित्र छिरेर मलाई
एक आत्मघाती हत्यारा बनाइदिन सक्छ ।
– सयौँ आमाको अस्तित्व एकै समयमा डगाउन सक्छ ।
भगवानको निरआकारलाई
महसुस नगरेको मानव रगत होला त ?
कुनै जनावर
पानी नपाएर,
खान नपाएर,
निदाउन नपाएर,
मरेको इतिहास छ ?
जनावरको सामूहिक हत्या
जनावरले गरेको सुन्नु भएको छ ?
जनावर आत्मघाती हत्यारा भएर हिँडेको
समाचार पढ्नु भएको छ ?
जनावर बलात्कार गर्दै हिँडेको देख्नु भएको छ ?
यहाँ यस्तो कसैले देखेको छैन ।
किनकि
भगवान मान्छले मात्रै महसुस गरेको छ ।
मान्छेले
सामुहिक हत्या गर्न
आत्मघाती हत्या गर्न
बलात्कार गर्नका लागि
चाडपर्व भनेर दिन तोकेको छ ।
किनकि मान्छे एक सर्वश्रेष्ठ प्राणी हो ।
मान्छेलाई थाहा छ
~भगवान वीर्य विरोधी हो ।
~भगवान बासना रहित छ ।
~ भगवान प्रेम मुक्त छ ।
~भगवान पवित्र छ ।
~भगवान निर आकार छ ।
~ भगवान अमर छ ।
किनकि मान्छे लागीपरेको छ
भगवानलाई अमर बनाउन।
भगवान बचाउन मानवताको विरुद्धमा पनि
उभिदिन्छ मान्छे ।
भगवानलाई यो पनि थाहा छ
मान्छे रहेसम्म भगवान रहिरहने छ ।
र
मान्छेलाई यो थाहा छैन भगवान रहिरह्यो भने
कुनै दिन मान्छे नरहन सक्छ ।

०००
२०८०-कार्तिक -०३
लम्कीचुहा, कैलाली