नेपाली हास्यव्यङ्ग्य अनलाइन पत्रिका

कृष्णशरण उपाध्याय पाैडेल :

खजाना र सम्पत्ति चारा बनाए
कठै ! देश मेरो बिचारा बनाए

गफाडीहरू छन् गफै मात्र गर्छन्
यहाँ जुन्किरीबाट तारा बनाए

हिजो स्वर्ग जस्तै थिए गाउँ मेरा
धुवाँ धूलिले ती अँध्यारा बनाए

युवाशक्ति सारा पठाई विदेश
सबै भूमि बाँझा र थारा बनाए

पछारे शयौं स्यालले एक गाई
लुछी खान नङ्ग्रा र दारा बनाए

महङ्गी बढाएर आकाश छोई
धनी निर्धनी सर्वहारा बनाए

अँध्यारो छ गल्ली, हिलोले बिचल्ली
न बाटो बनाए न धारा बनाए

कुनेता चुन्यौ कृष्ण ! तिम्रै छ दोष
तिनैले अरू ज्यानमारा बनाए ।

०००
चितवन