नेपाली हास्यव्यङ्ग्य अनलाइन पत्रिका

अन्जु शर्मा :

मैले सबै कुरा देखेँ
अनि कविता लेखेँ
त्यसैले त भनिन्छ
जहाँ पुगेनन् रवि
त्यहीँ पुगे कवि ।

कोठीमा साइँली र माइँली
बेचिएको देखेँ
हर्के र बिर्खेले खाडीमा
दम तोडेको देखेँ
काजी र मुखियाले
बाल र यौन शोषण
गरेको देखेँ
खास कुरा
कवि भएरै देखेँ ।

नेताहरूकै आडमा
कर्मचारी भ्रष्ट भएको देखेँ
भ्रष्ट चोख्याउन नेता स्वयं
बजेट बोकेर
विदेशिएको देखेँ ।

मैले त चित्र विचित्र देखेँ
वकिलहरू झगडा लगाउन
लागिपरेको देखेँ
पुलिसहरू चोरसँग मिलेमतो
गरेको देखेँ ।

त्यसैले देशमा
विकासमा भन्दा
पहिचानका लागि
हिंसा बढेको देखेँ
नदी बेचिएको भन्दै
हिमाल रोएको देखेँ ।

न्याय पाइन भन्दै
छोरी रोएको देखेँ
आफू मृत्यु शैय्यामा भएकोले
न्याय मरेको भन्दै
आमा रोएको देखेँ
हो मैले कवि भएरै देखेँ ।

०००
रातोपुल, काठमाडाैं