नेपाली हास्यव्यङ्ग्य अनलाइन पत्रिका

लक्ष्मण नेवटिया :

जता हेर्नुस् उतै नै, गज्जब भैरहेछ यसपालि,
चलिरहेछ प्रतियोगिता, दिनरात दिने गाली ।

बन्दुक पडकाउन सबैले, लिनुपर्छ स्वीकृति,
तर स्वीकृति चाहिदैन, गर्न गाली बेइज्जती ।

नबगाई कतै रगत, घाउ पार्छ गालीले गहिरो,
त्यसैले गाली दिनेको, लागेको आज ओइरो ।

अखबारभरी समाचार, तस्बिर पनि छापिने,
गाली महिमाले सबैतिर सजिलै सबै नापिने ।

रत्तिपनि ,नराखी शंका, हे वीर ! बढ अगाडि,
देउ खोजीखोजी गाली, डटेर, नहटेर पछाडि ।

हामीपनि लिउँ न गएर भाग,बजाउँदै ताली,
ओछ्याउनु छ देशभरि, गाली कै हरियाली ।

तिमी मलाई देऊ, म तिमीलाई दिन्छु गाली,
जोगिन कुकर्मबाट, उपाय उपयोगी जाली ।

चाहेको नभेटे बहाली, गर्न नपाए हालीमुहाली
भ्रमको खेतीमा चलाउनुस्, गालीको कोदाली ।

उमार्न जातिगत वैमनस्य, मच्चाउन घमासान,
मिलेर गरौँ स्थापित ! गाली विकास प्रतिष्ठान ।

०००
विराटनगर ।