नेपाली हास्यव्यङ्ग्य अनलाइन पत्रिका

घनश्याम रेग्मी :

(सन्दर्भ : भ्रष्टाचार विरुद्ध दिवस)

हाम्रो राम्रो मुलुक अहिले हाल बेहाल पारे
कालो धन्दा कति कति गरे द्रव्य जोरे थुपारे
यस्ता घाती शठ सब चुटी देशबाटै भगाऊँ
भ्रष्टाचारी जन जति चुनी लाग्छ आगो लगाऊँ ।१

पानी सुम्पे सलल बहने देशको भाग्य खोसी
माटो सुम्पे सरहद सबै छेउका दुष्ट पोसी
नौला नौला प्रहसन झिकी गर्दछौ मात्र खाऊँ
भ्रष्टाचारी जन जति चुनी लाग्छ आगो लगाऊँ ।२

मान्छे बेच्छन् परमुलुकमा हो विदेशी भनेर
जालो काट्छन् खबर जनमा रोक्नलाई सबेर
सामाग्रीका कतिपय लुटे यान गुन्डा, समाऊँ
भ्रष्टाचारी जन जति चुनी लाग्छ आगो लगाऊँ ।३

सत्तामा नै रमझम गरी बस्न पुज्दैछ पाउ
आफ्नो घ्यम्पो कलुष मनले भर्छ गर्दैछ ढ्याउ
अग्ला अग्ला महलबिचका भ्रष्ट नेता ठटाऊँ
भ्रष्टाचारी जन जति चुनी लाग्छ आगो लगाऊँ ।४

इँट्टा पोल्छन् गरिब जनका देह यी दाउरा हुन्
मान्छे मार्ने कतिपय छुटे नोट अर्बौं बुझे हुन्
नाङ्गो चाला कुकुरसरिका नाच्दछन्, यी भगाऊँ
भ्रष्टाचारी जन जति चुनी लाग्छ आगो लगाऊँ ।५

शिक्षा दीक्षा उचित पथको जो दिने हुन् उडाए
छोराछोरी परमुलुकमा पढ्नलाई पठाए
हाम्रो चुस्छन् रगत पसिना भ्रष्ट यी ठोक्न जाऊँ
भ्रष्टाचारी जन जति चुनी लाग्छ आगो लगाऊँ ।६

०००
बैजनाथ -१, चिसापानी, बाँके