रामदेव पाण्डेशान्त समाज भाँड्न पाइन्न
हामीलाई उही पुरानै मिलेको समाज चाहिन्छ हुँदाहुँदैको शान्त समाज भाँड्न कहाँ पाइन्छ ? तिमी जेसुकै भन अरू कुरा केही पनि जान्दैनौं नयाँ संविधान र यो व्यवस्था हामी मान्दै मान्दैनौँ ।
रामदेव पाण्डे :
हक र अधिकारका नाममा परम्परा मास्न पाइन्न
कथित तल्ला जातका हाँस्न र पोथी बास्न पाइन्न
कसले भन्छ विभेदमा पनि मिलेर बस्न सकिन्न
शान्ति र सौहार्दको भ्रमको खरानी घस्न सकिन्न ?
सर्त यत्ति हो ।
कथित ठुला र उपल्लाको अत्याचार सहनु पर्छ
विभेद र दमनबारे कसैलाई केही नकहनु पर्छ
चल्न सक्नु पर्छ ढोँगीले सिकाएको कर्मअनुसार
कथित उपल्लो जात र बहुमतको धर्मअनुसार
तर अचेल यस्तै छ ।
नारीलाई पनि पुरुषसरह अधिकार चाहिने रे
वर्षौंदेखि गर्दै आएको छुवाछुत गर्न नपाइने रे ?
जोसुकैलाई आफ्नै धर्म परम्परा मान्न दिनुपर्ने
के खाने के नखाने उसैलाई स्वयं छान्न दिनुपर्ने ?
यस्तो पनि काहीँ हुन्छ ?
समानताको आवाज उठाउनु धर्म छाड्नु हो
युगौँदेखि मिलेर बसेको समाजलाई भाँड्नु हो
जनता बन्न मन्जुर छैन पुनः प्रजा बन्न पाउनु पर्छ
मर्न मार्न सक्छौँ तर पुरानै व्यवस्था ल्याउनु पर्छ
खबरदार !
हामीलाई उही पुरानै मिलेको समाज चाहिन्छ
हुँदाहुँदैको शान्त समाज भाँड्न कहाँ पाइन्छ ?
तिमी जेसुकै भन अरू कुरा केही पनि जान्दैनौं
नयाँ संविधान र यो व्यवस्था हामी मान्दै मान्दैनौँ ।
०००
काठमाडौं
Subscribe
Login
0 Comments
Oldest
