नेपाली हास्यव्यङ्ग्य अनलाइन पत्रिका

कमला पन्थी अधिकारी :

बोली एक परन्तु काम छ अरू यस्तै गरेरै हिँडेँ
हज्जारौ जनता गिँडेँ तर झनै आफै बढी डुक्रिएँ
के के सर्त थिए तथापि सहजै पूरा तुरुन्तै गरेँ
निर्धा ती जनको लुटेर पसिना प्राडो पजेरो चढेँ । १।

ल्याएँ भोट अनेक तिग्डम गरी पाएँ ठुलो त्यो पद
नातेदार तथा सवर्ग जति थे साह्रै भए गद्गद
मात्रै स्वार्थ गरेर पूणर् म बसे यो देश गिर्दै गयो
सोचे झैं नहुँदा छ त्रास अहिले खै के भयो के भयो । २ ।

कस्ता छन् जनता निरीह विचरा वास्ता नगर्ने भएँ
आफ्नो जन्मथलो निकै पर भयो जाँदै नजाने भएँ
साना ती मसिना कुरा त जनका सुन्दै नसुन्ने भएँ
ऐले बल्ल निराश यो मन भयो स्वार्थी म नेता भएँ । ३ ।

धेरै खर्च गरी म डाक्छु जन ती भन्दैछु अर्कै कुरा
ढल्दा रूख जरै समेत कसरी के आउला आँकुरा
बानी पर्न गएछ है दिनदिनै सामन्त बन्दै गएँ
नारा एक थियो परन्तु कसरी आफैँ विलासी भएँ । ४।

आँखा वल्ला खुले विलम्ब हुन गो छन् दुःखमा ती सब
माफीको म कहाँ छु लायक यहाँ को दिन्छ माफी अब
धेरै क्षेत्र सखाप यो मुलुकको चौतर्फ चित्कार छ
गल्तीको फल प्राप्त भो अब बुझेँ नेता म धिक्कार छ । ५ ।

०००