नेपाली हास्यव्यङ्ग्य अनलाइन पत्रिका

कमला पन्थी अधिकारी :

गर्छन् आँट भएर निर्भय सदा आकाश जस्तै स्थिर
आफ्नो कर्म र धर्ममा अडिग छन् पन्छाउँदै जन्जिर
पर्छन् जे व्यवहार बाहिरतिरै गर्छन् समाधान ती
बा आमा परिवार सन्ततिहरू पाल्ने छ सामर्थ्य नि ।१।

पर्दा देश विदेशको सफरमा पुग्ने तुरुन्तै त्यता
धेरै थोक लिएर फेरि घरमा आफैं समाल्ने यता
यस्ता धेर अनेक मान्य गुणले बन्छन् सबैका प्रिय
मेरो काम भने झिना र मसिना यी कार्यमै सक्रिय ।२।

आफ्नो त्यो परिवार नायक हुने सौभाग्य नैै पाइन
भार्याको मह झैं मिठो र गुनिलो त्यो प्यार नै पाइन ।
आशादीप बनेर बल्न नसकी मात्रै भए सेविका
मेरो के छ र योगदान घरमा उल्लेख्य के छन् क्रिया ? ।३।

पर्दा रात सधैं डरैडर हुने कस्तो जुनी हो कठै
आधारात हुँदा सधैं भय हुने मान्छन् सबैले अझै
नारीका कति हुन् अनेक नमिठा छन् त्रासदी यी क्षण
मेरो जन्म थियो भने पुरूषको गर्थें निकै उत्सव ।४।

केही भाउ कतै न पाउन सकेँ दर्जा छ भान्से अझै
यौटै काम गरेँ निरन्तर हरे ! दिक्दार लाग्ने सधैं
जे जे भो जसरी भनी दिनदिनै भोगेँ जसै पाइन
धेरै कर्मठ त्यो जुनी पुरूषको मैले हुनै पाइनँ ।५।

०००
काठमाडाैं
निकट प्रकाशाेन्मुख कविताकृति ‘प्याराे छ नेपाल याे’ बाट