कमला पन्थी अधिकारीकठै ! वृद्ध जनले
भयाे चाला यस्तै जनक जननी रुग्ण तनले बसेका छन् पर्खी घरतिर कठै ! दिक्क मनले विदेशी बन्दै छन् तनुज तनुजा तान्छ धनले खपेका छन् पीडा निशिदिन कठै ! वृद्ध जनले ।
कमला पन्थी अधिकारी :
जवानीकाे बेला तन मन दुबैकाे बल कति
सबै पाेख्थे आफ्ना श्रम र पसिनाकाे भल अति
कठै ! कस्ताे आयाे समय पनि याे भन्छ मनले
खपेका छन् पीडा निशिदिन कठै ! वृद्ध जनले । १ ।
न खाना नानाकाे रहर मनमा हुन्छ अहिले
बजाना गानाकाे लहड मनमा छैन अहिले
हुँदा धेरै राेगी मरण अब हाेस् भन्छ मनले
खपेका छन् पीडा निशिदिन कठै ! वृद्ध जनले ।२
थिए छाेरा छाेरी तर पनि गए दूर थलमा
छ लागेकाे चिन्ता नजिक सब हुन् मृत्यु पलमा
पुराना साथीकाे पल पल गर्याे याद मनले
खपेका छन् पीडा निशिदिन कठै ! वृद्ध जनले।३ ।
बिरामी पर्दामा नजिक रहने मानिस पनि
भएनन् आफन्ती तब त मन पाेल्ने भतभती
जमाना कस्ताे याे परमुलक प्याराे छ धनले
खपेका छन् पीडा निशिदिन कठै ! वृद्ध जनले । ४ ।
भयाे चाला यस्तै जनक जननी रुग्ण तनले
बसेका छन् पर्खी घरतिर कठै ! दिक्क मनले
विदेशी बन्दै छन् तनुज तनुजा तान्छ धनले
खपेका छन् पीडा निशिदिन कठै ! वृद्ध जनले । ५।
०००
कलङ्की, काठमाडाे.
Subscribe
Login
0 Comments
Oldest
