नेपाली हास्यव्यङ्ग्य अनलाइन पत्रिका

रुद्र ज्ञवाली :

कुहियो भ्यागुतो एक प्रदूषित कुवा भयो
अगुवा जो थियोे ऐले त्यै बाटो हगुवा भयो
काले काले मिली भाले देशलाई बनाइयो
मानेन लाज हग्नेले बरू देख्ने लजाइयो ।

काटियो केकझैं देश चाटियो र चटाइयो
भन्दै हर्ष बढाईं हो निर्धा जीव कटाइयो
मन्साउन भनी ब्वाँसा महाभोज लगाइयो
मानेन लाज खानेले बरू देख्ने लजाइयो ।

गर्‍यौँ आदेश तामेली जे जे गर्न खटाइयो
खोक्दा मालिकले वा वा भन्दै ताली ठटाइयो
कैले बाँदर नाचियो कैले सर्प नचाइयो
मानेन लाज नाच्नेले बरू देख्ने लजाइयो ।

किन्दा हजारको वस्तु लाख करोड हालियो
बेच्दा करोडको माल कौडीका मोल फालियोे
समृद्धि भन्नु यस्तै हो भन्दै धन्दा चलाइयो
मानेन लाज लुट्नेले बरू देख्ने लजाइयो ।

अगस्ती खञ्चुवा गर्छन् खानकै मात्र गन्थन
के दिएँ देशका निम्ति कसैको छैन चिन्तन
आगो ताप्न भनी आफ्नै घर छाप्रो जलाइयो
मानेन लाज झोंस्नेले बरू देख्ने लजाइयो ।

देखेर षोडशी सत्ता चुह्याई र्‍याल तप्तप
बृद्धआश्रममा बस्ने सन्यासी गर्छ यो हठ
जसरी पनि त्यै राम्री षोडशी बधु चाहियो
मानेन लाज माग्नेले बरू देख्ने लजाइयो ।

के गरोस् शिष्यले शिक्षा चोर्ने मात्रै सिकेपछि
कुरा उखानकै मान्दा पनि मह झिकेपछि
चाटिनु पर्दथ्यो हात घारै परन्तु चाटियो
मानेन लाज चाट्नेले बरू देख्ने लजाइयो ।

०००
भैरहवा