नेपाली हास्यव्यङ्ग्य अनलाइन पत्रिका

भानुभक्त कुभिण्डेली :

राम्रो देखिन ‘राम राम’ मुखमा मान्छे सधैँ जप्दछ ।
मिल्दा घोप्न कतै सदा बगलमा लामो छुरा राख्दछ ॥
मैलो सोच सदैव हुन्छ मनमा दुष्कर्मको सर्वदा ।
हिँड्ला चट्ट परेर सुन्दर बनी छाला सिँगारी सदा ॥

साँचो सेवक भन्छ किन्तु कहिले गर्दैन सेवा पनि ।
साँचो धर्म ‘परोपकार’ कहिले बुझ्दैन दम्भी बनी ॥
गल्ती गर्छ स्वयम् परन्तु कहिले भन्दैन गल्ती भयो ।
अर्काको बदख्वाइँ गर्न जहिले आनन्द मान्दै गयो ॥

हेला गर्छ मुमा, बुबा तर सधैँ कुत्ता ठुलै पाल्दछ ।
प्रज्ञा ज्ञान निभाउँदै महलमा बत्ती ठुलै बाल्दछ ॥
थोरै मानवता रहेन दिलमा बन्दा छुचो दानव ।
भन्छन् यो कलिमा अनन्त गतिमा यस्तै हुने हो अब ॥

रातारात धनी हुने छ सपना “आनन्दमा नै रहूँ” ।
पापी कर्म गरेर हिँड्छ मनुवा तै भन्छ “राम्रो म हुँ” ॥
छोडी दूध, दही सुपथ्य जति छन् रक्सी सधैँ तान्दछ ।
धेरै गर्छ घमण्ड मात्र धनको पैसा ठुलो ठान्दछ ॥

ईर्ष्या गर्छ बढी अरू मनुजले गर्दा कतै उन्नति ।
खुट्टा तान्छ लडाउने प्रण गरी आफ्नो बिगारी मति ॥
आफ्ना मात्र कुरा सही र गतिला आफैँ ठुलो भन्दछ ।
बढ्दो त्यो अभिमानले दिनदिनै खाल्डो स्वयम् खन्दछ ॥

०००
भद्रपुर -१०, झापा