नेपाली हास्यव्यङ्ग्य अनलाइन पत्रिका

भानुभक्त कुभिण्डेली :

मलाई राम्राले राम्रै भने,
नराम्राले नराम्रो भने, के बिराए ?
मलाई फूलहरूले फूल नै देखे,
काँडाहरूले काँडा देखे, के बिराए ?

मलाई चोरहरूले चोर देखे,
इमानदारले इमानदार देखे, के बिराए ?
मलाई शत्रुहरूले शत्रु देखे,
मित्रहरूले मित्र नै देखे, के बिराए ?

मलाई मानवहरूले माया दिए,
दानवहरूले यातना दिए, के बिराए ?
मलाई लखुरहरूेले साथ दिए,
द्वारेहरूले लात दिए, के बिराए ?

मलाई घरवालाहरूले बास दिए,
मसानहरूले त्रास दिए, के बिराए ?
मलाई सज्जनहरूले मन पराए,
दुर्जनहरूले मन पराएनन्, के बिराए ?

मसँग सदाचारी नजिक भए
दुराचारी र व्यभिचारी टाढा भए, के बिराए ?
आफूसँग भएको कुरा नै देखाउने रहेछ,
जोजोसँग जे जे छ त्यही देखाए, के बिराए ?

मलाई स्रष्टाहरूले प्रशंसा गरे,
भ्रष्टहरूले खेदो गरे, के बिराए ?
अनि, सत्सङ्गीले भजन गाए,
जड्याहरूले जाँड खाए, के बिराए ?

०००
भद्रपुर–१०, झापा