नेपाली हास्यव्यङ्ग्य अनलाइन पत्रिका

भानुभक्त कुभिण्डेली :

आफूमात्र ठुलो, सशक्त बलियो भन्नेहरू छन् यहाँ ।
आफू सिंंह समान अन्य भुसुना गन्नेहरू छन् यहाँ ।।
आफैँ विज्ञ वरिष्ठ सर्वजनमा मान्नेहरू छन् यहाँ ।
बाँकी तुच्छ, बेकार, नीच तलका ठान्नेहरू छन् यहाँ ।।

कोही बढ्छ अगाडि सज्जन भने ढाल्नेहरू छन् यहाँ ।
आफ्नो तागतमाथि दम्भ मनमा पाल्नेहरू छन् यहाँ ।।
रच्दै ढोँङ अनन्त हात सजिलै तान्नेहरू छन् यहाँ ।
जप्दै राम परन्तु कर्द मुटुमा हान्नेहरू छन् यहाँ ।।

औँलाे नै जब दिन्छु पूर्ण डुँडुलो निल्नेहरू छन् यहाँ ।
छोडी सभ्य मनुष्य धूर्तसँग नै मिल्नेहरू छन् ।।
पापी कर्म गरेर माथि सजिलै पुग्नेहरू छन् यहाँ ।
आफ्नो ठाउ भएर नै सहजले भुक्नेहरू छन् यहाँ ।।

हड्डीको जब गन्ध आउँछ भने लड्नेहरू छन् यहाँ ।
गर्दै अब्बल चाकरी दिनदिनै बढ्नेहरू छन् यहाँ ।।
पर्दा काम कुनै असक्षम बनी भाग्नेहरू छन् यहाँ ।
देख्छौँ उच्च इनाम काम नगरी थाप्नेहरू छन् यहाँ ।।

आफू पुग्न उँभो अनन्त छलले झार्नेहरू छन् यहाँ ।
खानामा विषपान मिश्रण गरी मार्नेहरू छन् यहाँ ।।
गर्दा सुन्दर काम मर्दन गरी धस्नेहरू छन् यहाँ ।
साथीकै पनि भेषमा छल गरी डस्नेहरू छन् यहाँ ।।

०००
भद्रपुर, झापा