नेपाली हास्यव्यङ्ग्य अनलाइन पत्रिका

भानुभक्त कुभिण्डेली :

ए भाने ! कविता सशक्त भविता पारेर राम्रो तँ लेख् ।
अन्यायी खलपात्रका विषयमा गर्जेर भाने ! तँ लेख् ॥
आँखा चिम्म बनाउँछस् यदि भने भाने ! तँ के देख्दछस् ?
खुट्टा व्यर्थ कमाउँछस् यदि भने भाने ! तँ के लेख्दछस् ?

ढोँगी, यौन पिपासु, दुष्ट मतिका खोजेर भाने ! तँ लेख् ।
बन्छस् के कवि व्यर्थ लेख्न नसके भाने ! तँ छोड्दे नलेख् ॥
भन्डाफोर गरेर भ्रष्ट जतिको ती तथ्य सारा तँ लेख् ।
ए भाने ! डरपोक छस् यदि भने छोड्दे तँ लेख्दै नलेख् ॥

तेरा काव्य पढेर चित्त नबुझी भुक्छन् त भुक्दै गरून् ।
गल्लीका अभिलुप्त ती कुकुरले सन्त्रास जत्रै छरून् ॥
डाँका, शोषक, चोर, धूर्त, जति छन् खोजेर सारा तँ लेख्
भाने ! हिम्मत हार्नु हुन्न कहिले हार्छस् भने छोड् नलेख् ॥

गर्लान् दुर्व्यवहार दुष्ट जनले ती आततायी बनी ।
च्यात्लान् नै कृति पुस्तिका सहजले छौँ शक्तिशाली भनी ॥
भाने ! मर्न तयार हो बरु अझै ती दुष्टबारे तँ लेख् ।
के होला अब खै भनेर मनमा सन्देह पाल्दै नलेख् ॥

तेरो शक्ति सदैव यो कलम हो, मर्लास् तँ मर्दैन यो ।
कोही दिन्छ रवाफ गर्जन भने तर्सेर हार्दैन यो ॥
खोजी विकृति, भ्रष्ट काम, घटना सम्पूणर् कुरा तँ लेख्
चिल्ला, भाव विहीन, तुच्छ कविता भाने ! तँ छोड्दे नलेख् ॥

लेखी शब्द बलिष्ठ यो कलमले ढ्याङ्ग्रो बजा भ्रष्टको ।
बढ्दै धड्कन त्रासले मुटु छिटो कामोस् सबै दुष्टको ॥
घुस्याहा अभिशप्त छन् मुलुकमा खोजेर भाने ! तँ लेख् ।
हेर्छस् व्यर्थ अमूकझैँ यदि भने भाने ! तँ लेख्दै नलेख् ॥

द्वारेबा अझ छन् कुकर्म उधिनी गर्जेर भाने ! तँ लेख् ।
भ्रष्टाचार जतासुकै छ अहिले विष्फोट पार्दै तँ लेख् ॥
दुःखी, पीडित दीनहीन, निमुखा-को न्याय खोज्दै तँ लेख् ।
फोस्रा ती रसहीन तुच्छ कविता भाने ! तँ लेख्दै नलेख् ॥

थोत्रा चिन्तन, अन्ध सोच जति छन् मास्ने गरी काव्य लेख् ।
चोखो, मानवता दया र ममता गाँस्ने गरी काव्य लेख् ॥
“भानेका कविता पढौँ म जसरी” भन्ने बना पाठक ।
“भाने वास्तवमा सशक्त कवि हो” चिन्ने बना पाठक ॥

तेरो काव्य पढेर भित्र सबमा सद्भावना उब्जियोस् ।
आफ्नो राष्ट्र बनाउने विषयमा सुत्ने छिटो ब्यूँझियोस् ॥
पढ्दा शब्द र भावयुक्त कविता उठ्ने जुरुक्कै तँ लेख् ।
मात्रै छन्द मिलाउँछस् यदि भने भाने ! तँ लेख्दै नलेख् ॥

०००
भद्रपुर १०, झापा