नेपाली हास्यव्यङ्ग्य अनलाइन पत्रिका

भानुभक्त कुभिण्डेली :

अर्काको पार्दछन् राम्रो भविष्य जसले तर ।
उसैको अहिले देख्छौँ अन्धकार सधैँ घर ।।

पछिल्लो बेन्चमा बस्ने हिँड्छन् राज्य चलाएर ।
अघिल्लो बेन्चका बस्छन् भोकै शिष्य पढाएर ।।

हेप्दै, पेल्दै थिची ङ्याकी ती अपमान गर्दछन् ।
गुरुका काँधमा चढ्दै टाउकोतिर हान्दछन् ।।

पढाएका उनै शिष्य मन्त्री, प्रधानमन्त्री छन् ।
शिक्षकमाथि गर्दैछन् उनैले भेदभाव झन् ।।

कोही छन् चाकरी गर्दै झोला बोक्न रमाउने ।
लम्पसार परी कोही प्रतिष्ठा नै गुमाउने ।।

त्यसैले हेपिएका छन् सर्वाेच्च कर्मका गुरु ।
छोडेर चाकरीबाज भोकै बस तिमी बरु ।।

०००
भद्रपुर-१०, झापा