नेपाली हास्यव्यङ्ग्य अनलाइन पत्रिका

प्रमोद भट्टराई ‘प्रतीक’ :

हजुरबुवाले मलाई सुनाउनु हुन्थ्यो
सात सालमा प्रजातन्त्र आए’थ्यो अरे
अनि मात्र देशमा अमन चैन भएर
सुख र शान्तिको अनुभूति भए’थ्यो अरे !

उपलब्धिका गाथा सुनाउँदै गर्दाखेरी
मेरो बाल मनोविज्ञान प्रफुल्ल देखेर
हजुरबाको चेहरामा देखिन्थ्यो कान्ति
प्रजातन्त्र प्राप्तिको गौरव झल्किएर !

सायद अब मेरो पालो आएको थियो
हजुरबालाई गाथा सुनाउनु पर्ने थियो
तर वहाँको सौभाग्य मानौं वा दुर्भाग्य
न देख्न पाउनुभयो, न सुन्न पाउनुभयो !

वहाँ हुनुहुन्थ्यो भने अब म सुनाउने थिएँ
मैले भोगेको प्रजातन्त्रको अर्थ बुझाउने थिएँ
तपाईंको पालाको प्रजातन्त्र के प्रजातन्त्र ?
अहिलेको त झनै फराकिलो छ लोकतन्त्र !

लोकतन्त्रमा त दरबारबाट पाखा लाग्नुपर्छ
लोकतन्त्रमा त जङ्गलबाट दरबार पस्नुपर्छ
लोकतन्त्रमा तोडफोड र हड्ताल गर्न पाइन्छ
लोकतन्त्रमा खुलेआम भ्रष्टाचार गर्न पाइन्छ !

आफ्ना नाता गोता र आसेपासेहरु सबैले
उचित स्थान र सर्वोपरि सम्मान पाउँछन्
देउता र नेता एउटै हुन्, रिझाउनु मात्र पर्छ
गाउँमै बसेर सत्ताको स्वाद चाख्न पाउँछन् !

पाकाको संरक्षणमा लोकतन्त्र जोगाउनुपर्छ
यूवाहरू विदेश पलायन हुने बाटो खुलाउनपर्छ
विदेशी धनलाई स्वदेशमा प्रसस्त भित्र्याएर
शासकहरूको हैसियत मजबुत बनाउनुपर्छ !

तपाईंले नित्य पुज्ने गरेका भगवानको मात्रै
एकलौटी पेवा बनाउन पाइँदैन अब देशलाई
आफ्ना भगवानलाई खोपीमा थन्क्याइदिएर
समान भागबण्डा गरिदिनु पर्दछ सबैलाई !

लोकतन्त्रको मूल्य मान्यता नबुझ्नुको परिणाम
हजुरबुवाको सङ्कीर्ण मान्यता अब फेरिएको छ
लोकतन्त्रलाई आहारा बनाउने भक्षकहरुको लागि
लोकतन्त्र जोगाइदिन सबैले मरिमेट्नु परेको छ !!!

०००
कौशलटार, भक्तपुर