नेपाली हास्यव्यङ्ग्य अनलाइन पत्रिका

भानुभक्त कुभिण्डेली :

मान्छेको व्यवहार चाल र कुरा पर्गेल्न गाह्रो भयो ।
राम्रो बोल्दछ किन्तु गर्छ कसरी सिद्धान्त थारो भयो ॥
नारीको हक हित निम्ति जहिले गर्दैछ ऊ भाषण ।
आफ्नै जीवनसङ्गिनी दमन वा गर्दैछ ऊ शोषण ॥

अर्काको ऋण खान्छ तिर्न नसकी जग्गा धितो हान्दछ ।
बाबाको धनमा छ मोज उसको पालेँ बुबा भन्दछ ॥
राम्रो नैतिक ज्ञान बाँड्छ जसले मान्छे उही भ्रष्ट छ ।
मान्छे पण्डित भन्छ किन्तु मदिरा तान्ने कुरा प्रष्ट छ ॥

सारा जात समान हो मनुजको भन्दै फलाक्ला तर ।
खाँदा छेउ मिजार नै यदि पुगे ऊ सर्छ केही पर ॥
आफ्नो गेह समीप मार्ग नजिकै दुर्गन्ध नै पार्दछ ।
कोही प्याच्च थुके त्यही सडकमा झाँको ठुलो झार्दछ ॥

पुत्री पुत्र विभेद गर्न नहुने व्याख्या उसैको हुने
छोराको मृदु आसमा दस बढी छोरी त जन्माउने ।
“हट्नै पर्दछ दाइजो अब” भनी नारा लगायो हिजो ।
“धेरै पर्छ दिनू” भनेर अहिले माग्दैछ ऊ दाइजो ।

०००
भद्रपुर-१०, झापा