नेपाली हास्यव्यङ्ग्य अनलाइन पत्रिका

निर्मल रमण पराजुली :

कर्म गर फलको आशा नगर भन्छ भागवत
गीताले तिमी कर्ममा विश्वास गर्दैनौ किन ?
साहित्य सिर्जना समाजको यथार्थ ऐना
त्यही ऐनामा आफ्नो अस्तित्व खोज्दैनौ किन ?

सिर्जनाको सफलतामा पदकले ढोका खोल्छ
चाकरीमा गुठी प्रतिष्ठान धाउँछौ किन ?
कलमको निभमा वर्तमान र भविष्य छ
वर्तमान निखारे भविष्य उज्वल बुझ्दैनौ किन ?

तिमी साहित्यको ढोङ्गी हौ भने बजारमा
पदक पाइन्छ किनेर छातीमा भिर्दैनौ किन ?
यदि तिम्रो स्वाभिमानले धिक्कार्छ भने
चाकरीमा होइन कलममा विश्वास गर्दैनौ किन ?

लक्ष्मी प्रसाद पदकको पछाडि दौडिएको भए
मुनामदन अमर हुँदैनथ्यो सिक्दैनौ किन ?
सिर्जना अमर नभएको भए, आदिकवि
भानुभक्तको अगाडि हाम्रो शिर झुक्थ्यो किन ?

साहित्यिक पूजाले नै असल साहित्यको
जन्म हुन्छ, चेतनाको ढोका खोल्दैनौ किन ?
साहित्यले समाजको पर्दा उघार्छ पदकका
लालचीलाई बुद्धि देऊ ईश्वर ढिलो गर्छौ किन ??

०००
अतृप्त चाहनाको मझेरीमा (२०७३)