नेपाली हास्यव्यङ्ग्य अनलाइन पत्रिका

घनश्याम रेग्मी :

आए अनेक मान्छे नाता बिनेर आए
बाबा दया करेगा झोला भरी गराए
पार्टी यहाँ चलाए पोको ठुलो बनाए
बोको बढेछ साह्रै बित्यास भो गन्हाए ।

खाली लिएर लोटा गम्छा भिरेर आए
नाता यहाँ बढाए ती ज्वाइँ बन्न आए
आमा दिदी बनाए छन् भाइ मित्र साथी
कुम्लो ठुलो बनाए भागे लिएर राति ।

ठेक्का लिने उनै छन् बट्टा लिने उनै छन्
सट्टा लिने उनै छन् कट्टा लिने उनै छन्
लत्ता भिरेर आए पत्ता यहाँ लगाए
जथ्था लिएर आए सत्ता लुटेर खाए ।

सोझा सिधा समाए लाटा चुटी लखेटे
बैना दिएर ऐना त्यो काइयो र पोते
खोक्रो यता बनाए बोक्रो यता छ बाँकी
धोक्रो ठुलो बनाए थोत्रो यता खलाँती ।

किन्दा गरेछ नाफा बेच्दा गरेछ नाफा
रित्तै यता पसेको साँची रहेछ साफा
बाँकी रहेन बस्ती साँच्चै भए अगस्ति
जो जो यहाँ पसेका बस्थे कहाँ र अस्ति ।

कोही उडेर आए कोही गुडेर आए
भित्रै पसेर खाए खाए डकार लाए
छन् उत्तरी दिशाका छन् दक्षिणी दिशाका
आवास छन् उनैका उच्चा अहा सिसाका ।

छन् साधु सन्त कोही ढोँगी यहाँ अनन्त
आफन्त छन् यिनैका सन्तान छन् दिगन्त
पस्ने यहाँ बढेका रैथान ती हराए
हावा यता लगाए नेपाल लाग्छ खाए ।

०००
हाल- बैजनाथ गा पा वार्ड न १, चिसापानी, बाँके