नेपाली हास्यव्यङ्ग्य अनलाइन पत्रिका

हृषीकेश बराल :

आफ्नो मूल्य र मान्यता भुलिदिने व्यक्तित्व बेकार छन्
मान्छे मानवता पृथक् नबुझिने सोचाइ बेकार छन् ।
शिक्षा ज्ञान विवेक शिल्प नहुने मानुष्य बेकार छन्
हाँसो आँसु बनावटी यदि गरे ढोँगी त बेकार छन् ॥६

बिर्से गर्न परोपकार नरले उद्धार बेकार छन्
मागे मात्र विकास हुन्छ भनिने नेतृत्व बेकार छन् ।
साह्रै नीच हराम पण्डित भए पाण्डित्य बेकार छन्
बिर्से श्राद्ध पिता दिवङ्गत हुँदा संस्कार बेकार छन् ॥७

पालेका पशुबाट आय नबढे ती जन्तु बेकार छन्
विद्या आर्जनमा विवेक सकिए दीक्षान्त बेकार छन् ।
विद्या ज्ञान दया विवेक नभए ऐश्वर्य बेकार छन्
पापी उच्च पदस्थ मानिस हुँदा सम्पूणर् बेकार छन् ॥८

बोलेको बुझिँदैन भाषण भने सम्भाष बेकार छन्
खोजेमा अधिकार मात्र जहिल्यै कर्तव्य बेकार छन् ।
आम्दानी अनुसार खर्च नगरे हुन् मूर्ख बेकार छन्
साँचेको ढुकुटी निखार्न कसिए मस्तिष्क बेकार छन् ॥९

त्याग्छन् राष्ट्रियता नराधमहरू धिक्कार बेकार छन्
अर्ती हीन कथा निबन्ध कविता साहित्य बेकार छन् ।
आफ्नै मौलिक सभ्यता विधि भुले मान्छे त बेकार छन्
श्रद्धा प्रेम दया विवेक नभए भातृत्व बेकार छन् ॥१०
क्रमशः

०००
पोखरा