नेपाली हास्यव्यङ्ग्य अनलाइन पत्रिका

सुरेश राई :

सुरुमा ऊ
तँ होचो पुड्को होस् भन्छ
तँ गरीब बेरोजगार छस् भन्छ
तँ जस्तो कालो मसाने को छ र ! भन्छ
तँ कमजोर लुते भइस् भन्छ
तँ कुरुप तँ धराप भन्छ
तँ पछौटे तँ बाटोमुनिको भन्छ

भनिसकेर प्रियसी फेरि
‘सरी सरी ! जिस्केर भनेको’ भन्छ
बोलिसकेर साथी फेरि
‘नरिसा है ! रिसमा बोलेछु’ भन्छ
हेपिसकेर छिमेकी फेरि
‘माइन नगर्नू है ! मन जितेर भनेको’ भन्छ
घोचिसकेर मितज्यू फेरि
‘माफ पाऊँ है ! रक्सीले मातेर’ भन्छ
होच्याइ सकेर सहकर्मी फेरि
‘मनमा नलिनू ! आफ्नो सम्झेर पो’ भन्छ

हो यसरी यहाँ
कोही जिस्किएर साँचो बोल्छ
कोही रिसाएर साँचो बोल्छ
अरुलाई होचो, निर्धो, कुरुप
र कमजोर देखाउन
मान्छे मौका मिलाएर साँचो बोल्छ

बोल्नेलाई बोल्नु छ भने यहाँ
जस्सरी नि साँचो बोल्छ ।

०००
बाम्राङ, खोटाङ