नेपाली हास्यव्यङ्ग्य अनलाइन पत्रिका

रामशरण न्यौपाने :

शरद्मा खनियो वर्षा बाढी र पहिरो गयो
धनको जनको नाश देशभित्र ठुलो भयो।
केटाकेटीहरू हाँसे भो म बुढो त हाँसिन
जुवाडे झैँ बनायो खै दशैँले हरुवा किन ?॥१

दसैँ हाम्रो महान् पर्व मान्नुपर्छ मनाइयो
संस्कारले सजाएर जिन्दगी यो बनाइयो।
घाँटी हेरेर नै हाड निल्नुपर्छ खुसी लिन
जुवाडे झैँ बनायो खै दशैँले हरुवा किन ?॥२

धुपौरो न त चाँदीको थाली नै किनियो ठुलो
रेलो लागेर पैसा त्यो जाने के खनियो दुलो।
बिटो ल्याएर राखेको पैसा बाँकी नि देखिन
जुवाडे झैँ बनायो खै दशैँले हरुवा किन ?॥३

न त घोर्लेखसी ढालेँ चलाएँ ल्याउँदै किलो
कसैको भागमा छैन राजखानी तथा फिलो।
बिङ्गो तास तथा कौडा खेलिएन कुनै दिन
जुवाडे झैँ बनायो खै दशैँले हरुवा किन ?॥४

ज्वाइँ छोरीहरू आए आए नाति र नानिनी
बन्धु बान्धवका साथै मित्र साथी र सङ्गिनी।
टीकोटालो तथा खाना दक्षिणामा बिते दिन
जुवाडे झैँ बनायो खै दशैँले हरुवा किन ?॥५

०००
भक्तपुर