नेपाली हास्यव्यङ्ग्य अनलाइन पत्रिका

बद्रीप्रसाद दाहाल :

टोक्ने हिम्मत छैन कुक्कुर भने, बेकार हो भुक्नु ता
जुध्ने हिम्मत छैन डुग्रनु यहाँ, बेकार साँढे गधा ।
ढल्केकी वय अङ्गना जतिसुकै, श्रृङ्गारमा चम्किदा
तन्नेरी मन कल्पिँदैन कहिल्यै, वैलीसकेकी हुँदा ॥

भो — भो गर्जन छोड रित्तिन गयौ, खोक्रो भयौ बादल
वर्षा गर्न सकेन ताल तबला के बज्दछन् मादल ।
मात्रै क्रान्ति पिलाउने मन गरी, दौडी नहिँड्नु अब
खुट्टी देखिसक्यौँ नखोक ढँटुवा, जे-जे तमासा भर ॥

झापा दाङ महोत्तरी मुगु कयौँ, जिल्ला र ठाउँ घुम
नारा प्यून तयार छैन जनता, गम्भीरताले बुझ ।
छोड्यौ दर्शन मूल्य त्याग अहिले, व्यापार नीति बढे ।
सामन्ती मदमत्त भूतगतिले, सिद्धान्त पूरै सडे ॥

त्यस्ता दुष्ट लघार्छ, शिष्ट जनता हेक्का रहोस् है अब ।
कोही मर्न तयार छैन जनता पालो छ तिम्रा अब ॥
चर्का भाषण जादु श्लोगन छर्‍यौ फुस्सा पियौँ मज्जले ।
श्रद्धाभक्ति डढे सड्यौ जति तिमी तिल्के तथा मङ्गले ॥

(दाहाल नीलकण्ठ प्रज्ञा प्रतिष्ठानका अध्यक्ष हुनुहुन्छ)

०००
धादिङ